Torsk med sandefjordsmør

Overskrifta får spyttproduksjonen i gong og hjarta til å dunke litt hardarde.

Sjølv om sesongen for skrei er på hell, får ein fortsatt tak i fersk torsk. Ikkje nok med det, men på bui i heimbygdi har dei alltid poteter frå Lærdal. Lærdal har dei siste åra sett betydinga av å prioritere rein produksjon av grønsaker og bær.

I oppveksten stoppa vi alltid ved eit skur i Lærdal der det stod posar med 10 kg poteter, eit skrin og inga betjening. Du ser teikninga. Genialt.

Det er nok ikkje alle som kjenner seg like ivrige når det er snakk om mat, men gleda over eit godt måltid er nok same for dei fleste.

I dag skal det handle om torsk med Sandefjordsmør.

Sandefjordsmør er enkelt å tilbereie og ein slager hjå dei fleste. Sjølv om sausen består av ein god dose smør, gjer sitronen underverk når det gjeld å friske opp.

Ingrediensar for 4 personar: 

  • 4 - 8 skiver fersk torsk
  • Vatn
  • 2 ss salt per liter vatn
  • 3 dl kremfløyte
  • 200 g smør
  • ½ sitron
  • Salt og pepar
  • Hakka persille eller grasløk
  • Poteter
  • Gulrøter
  • Brokkoli

 

Framgangsmåten: 

Set rett mengde smør på kjøkendisken og del det gjerne i firkanta terningar.

Kok poteter.

Reins fiskeskivene godt i rennande kaldt vatn, pass på at alt av blod er vekk. For å få faste skiver let du fisken ligga i rennande kaldt vatn før den skal kokast.

Kok opp vatn med salt. Når vatnet kokar skrur du av plata og let fisken trekke utan lokk til den akkurat er gjennomkokt, det tek vel 7 minuttar.

Finn ein ny kasserolle til Sandefjordsmøret. Start med å varme opp fløyten over middels høg varme utan lokk til du har redusert fløyten til halve mengda, pass på heile tida og ikkje la det koke over.

Skru ned varmen og visp inn nokre terningar med smør. Det er viktig at sausen ikkje kokar medan smøret vispast inn fordi den då vil skilje seg.

Når alt smøret er komme i sausen skvisar du i ei halv sitron og smakar til sausen vert passe syrleg.

Smak til med salt, pepar og finhakka persille.

Eg føretrekk å skrelle gulrøtene, og bruke ein ostehøvel til å få fine skiver og servere dei råe. Brokkolien skal anten få eit kort oppkok eller dampast.

Potetene mosar eg med litt smør, og smakar til med alt og pepar.

Til måltidet kan ein servere ei rekke ulike vinar, i dag ynskjer eg å anbefale deg Gauda Abadía de San Campio Albariño 2015/2016.

Vinen er strålande å drikke åleine, men den fungerer også kjempeflott til maten. På nasen får ein nydeleg aroma som går i retning av honning, floralsk, sitrus og krydder. I munnen rommar vinen med smaken av eple, tropisk frukt, honning, krydder og har ei flott god lengde.

Kombinasjonen mellom mat og vin fungerer strålande. Syra og fedmen i sausen vert utfylt med aroma i vinen, og det gjorde ingenting at eg hadde i litt for mykje salt i vatnet til fisken - snarare tvert imot.

Sjølv om ein gjerne lovprisar lammet i påska, går det godt an å ta ein pause med eit fiskemåltid og ein spanande kvitvin i glaset.