Raudbete og chevre

Samansettinga slår aldri feil. Den intense raudbeteten og den stramme geitosten er som skapte for kvarandre.

Mange har gjerne eit anstrengt forhold til både raudbeten og geitosten. Berre lukta av geitosten kan få mange til å grøsse. Eg skal innrømme at for mykje av det gode kan sjølv eg reagere på, men litt av begge kan gi ei ny smaksoppleving.

Bruksområda til raudbete og chevre ilag er mange, la deg inspirere av gode oppskrifter som er tilgjengelege på nettet.

For berre eit par år sidan fekk eg den fyrste openbaringa under eit måltid på Litteraturhuset i Bergen. Som alltid kunne ein velje mellom forskjellige tiltalande forrettar, deriblant raudbete og chevre. Ettersom samansetninga aldri heilt hadde slått meg, måtte ein jo berre gi det ein ny sjanse, spesielt når det blir anbefalt.

Attpåtil vart ei flaske raud Burgund bestilt, ikkje verre enn Chateau De La Tour Clos-Vougeot Grand Cru 2004, i hovudsak tenkt til hovudretten beståande av skrei. Då var det heller ikkje feil å sette vinen saman med ein forrett beståande av raudbete og chevre.

Eg må framleis smile når eg tenkjer tilbake på dette måltidet, fordi eg føler meg utruleg heldig. Eit måltid beståande av eineståande smakar, ikkje minst saman med ein god samtale, var ei oppleving eg seint vil gløyme. Kva ein å be om noko meir?

Eg ynskjer difor å gi deg litt inspirasjon til ein forrett med raudbet og dressing med litt chevre i.

Den er enkel og enormt smaksrik.

 

Ingrediensar: 

  • 4 små eller 2 store raudbetar
  • 2 kvitlauksfedd
  • Olivenolje
  • 2 eple i tynne skiver
  • Safta frå ei sitron
  • Pinjekjerne
  • Baby leaf
  • 4 dl solsikkeolje
  • 4-5 ss Snøfrisk
  • 4-5 ss rømme
  • Smak til med salt og pepar

 

Bruk gjerne latexhandsaker når du skreller raudbete fordi fargen er så intens og set spor etter seg.

Skrell raudbetane og del opp i ønska storleik.

Legg raudbetane i ei eldfast form og hell over litt olivenolje, strø havsalt, og gi kvitlaukane ein klem med kniven før du legger dei i forma. Steik på 200 grader til raudbetane er møre, ein stad mellom 20-30 minuttar (kjenn etter).

Lag dressing ved å blande saman rømme og Snøfrisk, og smak til med salt og pepar.

Pinjekjerne får seg ein runde på steikepanna. Varm opp, men ver forsiktig med å ikkje brenne dei. Dette tek ikkje mange minuttane.

Vend baby leaf i ein bolle saman med litt sitronsaft og fordel det på ei fjøl. Legg raudbetane over, dressinga og pinjekjerna.

Del opp epla i tynne skiver og press litt sitronsaft over for å unngå at dei vert brune. Avslutt med å dander epleskivene over forretten.

Til å ha i glaset kan ein finne mykje godt, og eg vil anbefale Soalheiro Vinho Verde Alvarinho 2015. Vinen er svært tiltalande på nasen med aroma av sitrus, pære, blomst og eit snev av fersken. I munnen kjem desse aromaane att, i tillegg til mineralar og nøtter i retninga av mandel.

Denne smaksrike og delikate forretten laga eg på nyttårsafta. Langbordet vart fylt med store, små, venner og familie. Retten slo an, og ikkje nok med det, men søstra mi som ikkje er like van med ulike smakar, og kan til tider vera kresen, var også godt nøgd. Du kan tru eg var overlukkeleg

Sjølv om mange gjerne har eit hat/elsk-forhold til raudbeten fordi den gir mykje smak, kan samansetninga på tallerken vekke nysgjerrigheit, sjølv hjå den sekptiske. Vinen er ikkje komplisert, heller saftig og svært god til måltidet.

Om du har eit ynskje om å impoere, eller rett og slett berre ynskjer eit smaksrikt måltid for deg sjølv, slår denne samansetninga ikkje feil.